Індэкс беларуска-ўкраінскіх адносін выходзіць ужо трэці раз. Даследаванне штогод ацэньвае стан і дынаміку беларуска-ўкраінскіх адносін, каб паказаць не толькі тое, наколькі інтэнсіўнымі з’яўляюцца кантакты паміж дзвюма краінамі, але і тое, як змяняецца іх характар.
У 2026 годзе агульнае значэнне Індэкса засталося на мінімальным узроўні — 1,0 з 5. Аднак за гэтай адноснай стабільнасцю адбываюцца істотныя змены ў асобных сферах.
Найбольш прыкметная змена адбылася ў палітычным вымярэнні: яго значэнне вырасла з 1,0 да 2,0. Асабліва істотна палепшыліся адносіны Украіны з беларускімі дэмакратычнымі сіламі — гэты паказчык вырас з 2,0 да 3,0, а экспертная ацэнка яго дынамікі склала +0,76, што з’яўляецца найбольшым пазітыўным зрухам за тры выпускі Індэкса. Адначасова афіцыйныя адносіны паміж Кіевам і Мінскам застаюцца на мінімальным узроўні.
У эканамічнай і бяспекавай сферах значэнне Індэкса засталося на ўзроўні 1,0. Эканамічныя сувязі паміж краінамі пасля 2022 года практычна спыніліся, а захаваныя кантакты маюць пераважна фрагментарны або непрамы характар.
Адносіны ў сферы культуры і адукацыі сталі адзіным напрамкам, дзе значэнне Індэкса знізілася на цэлы бал — з 2,0 да 1,0. Гэта паказвае, што гарызантальныя сувязі, якія раней маглі часткова захоўвацца незалежна ад палітычнага дыялогу, таксама адчуваюць наступствы вайны і агульнага пагаршэння адносін.
Пры гэтым адносіны паміж беларускім і ўкраінскім грамадствамі застаюцца на ўзроўні 2,0. Нягледзячы на значнае скарачэнне кантактаў і трансгранічнага руху, сямейныя, прафесійныя і асабістыя сувязі паміж людзьмі не зніклі.
Як праводзілася даследаванне
Індэкс разглядае адносіны ў трохкутніку «Кіеў — Мінск — беларускія дэмакратычныя сілы» і ацэньвае іх па пяці напрамках: палітыка, эканоміка, бяспека, культура і адукацыя, адносіны паміж грамадствамі. Даследаванне спалучае экспертнае анкетнае апытанне, паўструктураваныя інтэрв’ю і збор фактычных і статыстычных дадзеных. У 2026 годзе ў анкетным апытанні прыняў удзел 31 рэспандэнт, было праведзена 11 паўструктураваных экспертных інтэрв’ю.
Поўная справаздача «Індэкс беларуска-ўкраінскіх адносін — 2026» дае больш падрабязны аналіз палітычных, эканамічных, бяспекавых, культурных і грамадскіх сувязяў паміж Беларуссю і Украінай, а таксама разглядае магчымыя напрамкі іх далейшага развіцця.
Тэкст на ўкраінскай мове: